Erakusketak errepasoa egiten dio metroak bere bezeroei helarazi dizkien informazio- eta publizitate mezuen eboluzio grafikoari.
Lehenengo gaueko zerbitzua, lineen hedapena, geltoki berrien irekiera edo kanpaina zibikoak dira jasotako gertaeretako batzuk.
Formatu berritzaile bat da, metroaren geltokietan orain arte inoiz ere ikusi ez dena.
Metro Bilbaoren 30. urteurrenaren kariaz, Abando geltokiak hiru hamarkadetako sormenari errepasoa egiten dion erakusketa bat jasotzen du gaurtik aurrera, hainbat publizitate- edo informazio-helburuetarako erabilitako kartel propioen aukeraketa baten bitartez. 50 lan baino gehiago dituen bilduma bat da, dohainik bisitatu ahal izango dena datozen bi hilabeteetan.
Erakusketak bestelako forma bat proposatzen du Metro Bilbaoren urteurrena ospatzeko, sormena bereziki nabarmenduz garraiobide honen ibilbidearen ildo nagusi bezala. Askotariko pieza grafikoen bitartez, publikoak ikusi ahal izango du nola eboluzionatu duten mezuek, estiloek eta sentsibilitateek urte hauetan.
Erakusketa Metro Bilbaoren jarduna urte hauetan markatu duten tematikei buruzko kartelez osatuta dago, gizarte-gaiak edo zerbitzuari buruzko informazio propioa jorratuz. Gaueko lehenengo zerbitzua abiatu zenean 1996an diseinatutako iragarkia, 2. Linearen inaugurazioa eta trazatua geltoki berriez hedatzea, edo zenbait kanpaina zibiko dira erakusketa original eta koloretsu honetan ikusi ahal izango diren adibide batzuk.
Ekimenaren alderdi berezienetako bat bere erakusketa-formatua da. Hala, erakusketak Abandon jartzeko erabili ohi den korridoreaz gain (Renfe sarbidea), erakusketa ohikoa ez den espazio batean ere jarri da: mezzaninarekin konektatzen duten eskailera mekanikoen hormetan.
Pieza bakoitza formatu muralean aurkezten da, horman finkatuta eta 50x80 zentimetroko tamainarekin; horrek ahalbidetzen du xehetasunez ikustea, begi-kolpe batez, kanpaina bakoitzaren eboluzio grafiko eta kontzeptuala.
